Ganga Sati
ભજન-પ્રભાતિયા-પ્રાર્થના

માણવો હોય તો રસ માણી લેજો પાનબાઈ

માણવો હોય તો રસ માણી લેજો પાનબાઈ!
હવે આવી ચૂક્યો પિયાલો,
કે’વું હતું તે કહી દીધું પાનબાઈ!
હવે રે’ણી પાળવા હેતથી હાલો … માણવો.

રે’ણી થકી જોને રામ રીઝે પાનબાઈ!
રે’ણી થકી રોમરોમ ભીંજાય,
રે’ણી થકી રસ શરીરમાં પરવરે,
રે’ણી થકી ઉગાવો જોને થાય … માણવો.

રે’ણી થકી ગુરુજી સાનમાં સમજાવે,
રે’ણી થકી અમર જોને થવાય,
રે’ણી થકી અદ્ધર ઉતારા પાનબાઈ!
રે’ણી થકી પાર પોગી જોને જવાય … માણવો.

રે’ણી તે સરવથી મોટી પાનબાઈ!
રે’ણીથી મરજીવા બની જોને જાય;
ગંગા રે સતી એમ બોલિયાં રે,
રે’ણી પાળ્યેથી આનંદ વરતાય … માણવો.

– ગંગા સતી