આઘેરી વનરાઈ ઇંધન ક્યાં ચેતાય ?
કોને આંગણ યજ્ઞમાં આપણ તેડાં થાય ?
યજ્ઞનો ધૂપ ધમ ધમ દિગન્તે ચડે,
નોતરાં યુધ્ધનાં બારડોલી-ઘરે,
દૂર બેઠેલ અમ પ્રાણ થનગન કરે,
યજ્ઞનો ધૂપ આકાશભર ઊભરે,
મીઠી સૌરભ ધૂપની દૂર સુદુર છવાય,
લાખો હૈયા તુજ પરે હોમાવા હરખાય;
લાખ હૈયાં ધબકતાં તુંને ભેટવા
તોપ બંદૂક તલવાર પર લેટવા,
આજ તુજ યજ્ઞ-ધૂપે સહાતી હવા
પ્રેરતી લાખને યુદ્ધ-ઘેલા થવા.
લાખ લાખ નયનો રહ્યાં નીરખી અંબર માંય,
તારા યજ્ઞ-ધુંવા તણી યજ્ઞ-નિમંત્રક ઝાંય.
નીરખતાં લાખ નયનો ગગન-કાંગરે,
ધૂંધળો ધૂપ ચડતો જગત-નોતરે,
ભડ થજે, ભય નથી, આજ અમરાપરે
દેવ-કુલ યજ્ઞ તવ નીરખવા ઊતરે.
રહેજે મક્કમ મરણ લગ, મોત બિચારું કોણ !
તું મરતે જીવવું ગમે એવો કાયર કોણ !
તું મરંતે હજારો તનય હિન્દના
વિચરવા એ જ પંથે અમર ધામના
સજ્જઊભા : તું નિષ્પાપ છે, ડરીશ ના !
યજ્ઞનો ધૂપ પીધા પછી ફરીશ ના !
ઝવેરચંદ મેઘાણી
-સિંધુડો
